نصائح لتطوير لغه ، إيش أحتاج ؟ + تحدي تعلم لغه جديده
19/9/2013
و أخيراً إستجمعت نفسي عشان أقدر أكتب شي جديد بعد موجه غريبه بدماغي مرت على خير
اممم التدوينه ذي تقريباً تجربه شخصيه مع تحدي ، مو عارفه إذا ممكن أفيد أحد لكن بكتب...
بالبدايه أنا مغرمه باللغات صحيح ما عندي خلفيه عن كثيير لغات لكن "اللغات" بشكل عام لها صوره حلوه بدماغي ، بإختصار أشوفها شي ممتع و تفتح أبواب و مجالات كثييير قدام الواحد ما كان بيوم يتخيل إنها موجوده و بما إني إتخرجت هالسنه من الثانوي و ما أفكر حالياً أدخل جامعه أو معهد و طبعاً بدال ما امر على ارضيه كل غرف البيت و انسدح فيها و أتفرج على الناس و هي تمشي حياتها أو اضيع وقتي بأشياء مارح تفيد و الأهم أتفادى موجات الكأبه و الموجات الغربيه إلي تعصف بدماغي بين فتره و ثانيه قررت أسوي تحديات أولها أطور لغه / أتعلم لغه ، رح أخذ الموضوع كتحدي بيني و بين نفسي بما إني من النوع إلي يمل بسرعه و يحتاج تشجيع ...
تقيم عوده كارا بأغنيه give away / damage lady ألبوم Full bloom [ انتهى ]
13/9/2013
الفرقه اللطيفه كارا رجعوا بفهوم مختلف عن العاده أو عن الصوره اللطيفه إلي يقدمونها بالعاده ، ممكن مو شي مختلف جداً لكنه شي مميز "بالنسبه لي يمكن (؟)" بس عموما شي يستاهل إنى نتكلم عنه
تجربتي مع العدسات الآسيوية Geo + طريقة التسوق والطلب عبر الإنترنت ! ♥♥♥
11/9/2013
من فترة أنا معجبة بالعدسات، بس طبعا مستحيل أخليها تقرب من عيني ..
أحسها تملى العين حتى لو ماحطيتي غير مسكرة و رسمتي حواجبك بس بيطلع شكلك حلو وناعم!
في يوم مدري إش صار لي قريبتي دخلت محل عدسات وأنا وراها .. ومدري إش صار خلاني أشتري وحدة ..
كان مشروع لبس عدسات استمر لعدة أيام ، بالنهاية صحباتي الله يسعدهم شجعوني وهزؤني لين مالبستها كانت الفرحة مش سايعاني!
من وقتها وأنا معجبة فيها أقدر أقولكم إنها عشقي الممنوع حاليا !
من فترة مو بسيطة وأنا أطالع بالاولجانغ الكوريات ( في تدوينة قادمة مع رينا عنهم ^^) و ألقاهم لابسين العدسات المدورة ..
وقررت أطلبها ! طلبت ٣ ألوان مختلفة من موقع آسيوي yesstyle.com
السر في البساطة! 3> أفكار بسيطة ليوم مشرق !
8/9/2013
.
.
.
.
بصراحة ، وعلى حسب جدولي كان المفروض أكتب تدوينة تانية بالمرة - واللي بالمناسبة مرة موضوعها أثار إهتمامي الفترة الماضية- ولكن على كلٍ .. أشياء كتير صارت "ألهمتني" زي ما نقول إني أكتب الشي دا..
بالفترة الماضية وكأنها حرب شعواء بداخلي.. تقريبا ماعرف إش المشكلة بالضبط ولكن وببساطة صايرة أتوتر من أي تغيير بسيط .. طبعا الصيف ملك التغيير بالمناسبة واللي يعتبر كابوس بالنسبة لإنسانة روتينية مثلي..
إنسانة تتفرج نفس نوعية الأفلام، ممثلين محددين ، حقبة زمنية محددة ، موسيقا (إيوة متعمدة أكتبها كدا) محددة ، كتب مغنيين كل شي عندي محدود .. أرفض بالغالب تجربة أي شي جديد ..
معرف إش الفكرة بالضبط بس باعتقادي أي شي ما أعرفه يعني مو حلو ..
نقدر نقول وجهة نظري كانت ملوثة شوية .. و تطفش@@"
حاولت ألقى طرق جديدة أبعد الملل و أغير جوي البيض نوعا ما !
حاجات بسيطة ،، وأفكار ممكن تغير مودك ولو لشي بسيط !! ~~~~
- جددي لستة أغانيكي!
أنا أسمع كوري إنجليزي عربي ياباني تايواني فرنسي أي لغة تخطر ببالكم .. باعتبار إنه الموسيقا لوحدها لغة موحدة يفهمها العالم .. وبغض النظر عن نظرتكم للموسيقا أنا أعتبرها عالمي .. مكاني الخيالي اللي أرسم فيه شخصياتي أكون فيه مشاعري و أعيش فيه حاضري و مستقبلي ~
وعشان شوية تغيير سألت عن أغاني جديدة ، اللي أعطاني لستة كاملة واللي أعطاني أغاني معينة ..
طبعا للآن أعض على أصابع الندم لأني مو قادرة أخلصها من كثرها ماشاء الله .. بس نقدر نقول غيرت جوي تماما!
و راح أخلص كل اللي جاني بأقرب فرصة إن شاء الله ، أكتشف وجهات نظر جديدة نوعا ما ..
الفكرة من دا كله؟
إن كنت تحب الموسيقا دايما أسمع شي جديد.. ماتفرق لو كانت لأحد ماتطيقه.. بس أستمتع وعيش جوك!
لاحظ الآلات المستخدمة ، الدقات ، التكرار ، مراحل الأغنية مو شرط تفهم الكلمات نادر جدا تلقى كلمات تستاهل !
جد أستمتع بشكل ماتتخيلوه وأنا ألاحظ كل جزئية بالأغنية .. طبعا أألف قصة بكيفي دامي ما أفهم الكلمات ..
إذا تبغو لستة جيدة بس أدونا منشن بتويتر راح اكون جد سعيدة أديكم كم شي لطيف.. بشرط تسمعوه مو تأخروه زيي :(
- غيري من أفلامك ، الممثلين ..
* بالمناسبة أنا معجبة بصورة سعاد حسني اللي فوق .. جميييييلة فعلا*
يب أنا ممكن أعيد فيلم أحمد حلمي / أحمد مكي قرابة الـ ١٩٠٠ مرة ومااطفش أو أمل ..
بنفس الوقت ممكن أحد لو كلمته عن فيلم مصري يطالع فيا باستحقار كني أكلت ضفدع قدامه ... :|
فيلم و بالغالب مح يفرق شي غير إنك تنبسط ! عموما من فترة بسيطة بدأت أتابع أفلام أبيض وأسود وفعليا شي يبسط
البساطة بالنوعية دي من الأفلام جد يحسسك بخفة جميلة حتى لو الإنتاج بدائي تقريبا ..
أفلام كوميدية ، دراما ، كلاسيكي أجنبي ، مسرحيات مصرية (وهي المفضلة عندي للأبد!) ، وحاجات كثير من الوقت للتاني نغير .. أي لغة أي أرض حلو إننا نشوف وجهة نظر الناس للحياة ، مشاكل عصرهم ..
فكرة إنك محتفظة بفكرة عن جنسية معينة من ١٠ سنين هدي تنسيها بالمرة .. وأستمتعي .. مع الوقت بتلاحظي حاجات جميلة ماشفتيها قبل..
تقتلي روتينك نوعا ما وتستفيدي شي جديد وإن ماعجبك .. حطي نظارتك الإيجابية فقط !
- ابعدي عن ضجة الحياة الإلكترونية !
إيميلات ، تويتر ، فيس بوك ، باث ، انستقرام ، واتساب ، لاين ، كاكاو توك ووو
اليوم بيضيع وإنتي تجلسي تشيكي ... وهم بسيط فوق هم يصير عندك جبل من الحاجات المتراكمة!
اليوم أفكر بالجامعة ... أبغا أبعد .. للأسف بالنسبة لطالبة اعتمادي كله ع الأجهزة .. إن ماكلمت أهلي بيوم بيحسبو إني انخطفت ومت واحتمال كبير أدمنت مخدرات ودحين بمشي بشوارع نيويورك سكرانه .. دراما
بس يب هي دي الحياة تقريبا... بس بحاول يكون لي ع الأقل يوم واحد أف
أقرأ فيه ، أمشي ، أتدرب ع المكياج * يب أتدرب وجهي طول اليوم ملطع حاجات غريبة* ، أطبخ ، أنزل أتمشى شوية .. أعمل رياضة ... نامي يختي .. بس ريحي أعصابك من التفكير بكل شي يدور بالعالم بيوم ..
- احترمي جسمك بحق الرب!
فقر دم ، هشاشة عظام ، مشاكل عامة بالعظام وخشونة بالركب(!) ، سمنة أو نحافة مفرطة ، كسل وخمول !
تقريبا هدي أعراض وحدة في التسعين ؟ أبدا أتكلم عن بنت العشرين وأنا أولكم !
دايما أستغرب من الناس الكبار بالسن كيف يجرو يتحركو وأنا لو مشيت أحس إني بطة تمشي على الأرض بلا هدف..
أحاول حاليا أزيد ساعات المشي والرياضة البسيطة .. ع الأقل يرجع لي نشاطي .. طبعا أكل أفضل وموية كثير..
جميل جدا إنك تهتمي بنفسك ، مو عيب لو زرتي عيادات لبشرتك \ دايت \ أي حاجة تانية وسألتيها عن حاجات بسيطة تقلقك ... مو لازم تكوني مشلفطة عشان تروحي (الكلمة تستحق التأمل بالمناسبة .-.) أتطمني ع نفسك وغيري الحاجات اللي تطفشك ..
أتأملي ، حاولي تسترخي فقط لتريحي أعصابك من يوم طويل قاتل للحياة ...
ببالي حاجات طويلة ~ بس حبيت أختصرها عليكم ..
فكرتي دايما إنه الواحد يغير حاجات بسيطة .. مو لازم يكون عندك ملايين ولا سفريات أو خرجات
الغالب بإيدك إنتي تبسطي نفسك وبإيدك تكرهي حياتك وتحوليها لدراما ....
بالنهاية قولولنا إيش الأشياء اللي ممكن تسعدكم وتغير جوكم تماما ! هنا أو على تويتر ~
الاشتراك في:
الرسائل (Atom)