تجربتي مع العدسات الآسيوية Geo + طريقة التسوق والطلب عبر الإنترنت ! ♥♥♥

من فترة أنا معجبة بالعدسات، بس طبعا مستحيل أخليها تقرب من عيني .. 

أحسها تملى العين حتى لو ماحطيتي غير مسكرة و رسمتي حواجبك بس بيطلع شكلك حلو وناعم! 

في يوم مدري إش صار لي قريبتي دخلت محل عدسات وأنا وراها .. ومدري إش صار خلاني أشتري وحدة .. 

كان مشروع لبس عدسات استمر لعدة أيام ، بالنهاية صحباتي الله يسعدهم شجعوني وهزؤني لين مالبستها كانت الفرحة مش سايعاني!

من وقتها وأنا معجبة فيها أقدر أقولكم إنها عشقي الممنوع حاليا ! 

من فترة مو بسيطة وأنا أطالع بالاولجانغ الكوريات ( في تدوينة قادمة مع رينا عنهم ^^)  و ألقاهم لابسين العدسات المدورة .. 

وقررت أطلبها ! طلبت ٣ ألوان مختلفة من موقع آسيوي yesstyle.com 

اللون الأول Xtra 3 tone green من هنـا 

ناسب لون بشرتي (حنطية) تماما وناسبت شكل عيوني الحادة نوعا ما .. هي جاية شوية مصطنعة بصراحة 

يمكن ناس تناسبهم لكن عني ما ارتحت لمنظرها بعيني  .. 

اللون الثاني WBS 202 Blue من هنا 

ماحبيتها بالضبط .. يمكن اللون ماناسبني بس حسيتني بسة أو شي مصطنع تماما 

برة العين تبين كنها شي من الإنيمي ..

اللون الثالث AN A44 Choco brown من هنا 

المفضلة ( All-Kill) . جد أكتر شي ناسبني .. باينة طبيعية تماما بنفس الوقت أعطت حدقة عيني شكل أكبر وأكثر صحية 

لو كنت فاضية قبل الدوام كان لبستها كل يوم بصراحة من جمالها *^*

بصفة عامة .. 

- العدسة نفسها تجي كبيرة .. كانت صعبة علي كمبتدئة تماما بالعدسات .. العادية حقتي كانت أصغر تدخل بالعين أسهل.

- أحيانا شكلها يصرخ FAKE ! ماتنلبس كل يوم وتاكل العين أفضل تحطي مكياج خفيف لمن تلبسيها!

- تنشف بسرعة، ما أدري هو طبيعي أو لأ بس لاحظت إنها تنشف بإيدي بسرعة لو مادخلتها.. حتى بالعين نوعا ما كأنها نشفت جوا العين ؟ أي 

- بالنسبة لي غير الجفاف وقت أشيلها بس بصفة عامة مريحة بالعين لدرجة ما أحس بوجودها.. وما أحس بصداع مع إنها مو مقاس نظري .. بس عكس اللي قبل كانت تقتلني .. 

كيف أطلبها؟

عن نفسي طلبتها برة السعودية فيمكن في اختلاف بسيط من ناحية التوصيل بس بالنهاية بتوصلك إن شاء الله 

مبدئيا إيش راح تحتاجي؟

- بطاقة فيزا/ ماستر كارد.. ( دايما أفضل يكون عندي حساب بالـPayPal آمن بنفس الوقت مافيا أدخل أرقام البطاقة كل مرة) ! 

- أعرفي عنوانك كويس ورمز المنطقة (مكتب البريد بالمنطقة اللي ساكنه فيها)  .

- رقم جوالي أو رقمين يكونو شغالين كويس وتقدري تردي عليه بأي وقت خصوصا بالصباح! 

الآن روحي لموقع يس ستايل الآسيوي وابدأي سجلي لك حساب  Join now!

 ( الموقع جميل وفيه حاجات غير العدسات زي أزياء مكياج أسوي اكسسوارات .. حاولي تجربي أول مرة الطلب بشي خفيف عشان تعرفي كيف النظام بمنطقتك وكيف تعامل مكتب البريد الخ الخ  وبعدها الأفضل تطلبي كومة أشياء مرة وحدة توفير للشحن) 

حطي معلوماتك الأساسية و سجلي 

 من هنا طبعا اختاري العدسة اللي تبغيها وفي كذا عدسة توفر مقاسات طبية.. 

هنا راح تنتبهي لأنه السعر الموجود هو سعر عدسة وحدة بس ! يعني إذا تبغي تشتري لازم تشتري مرتين

هدي الغلطة أنا طحت فيها واضطريت أطلب ال٣ الباقي متأخر ووصلت متأخر عن العدسات اللي كانت متأخرة من الأساس -.- 

الآن مثلا أخترتي العدسة اضغطي على Add to bag لاتنسي ضروري جدا إنك تاخدي عدستين .. كل عدسة سعرها وحده بيكون .. 

الآن أدخلي على Shopping Bag بأعلى الصفحة .. بيجيكي شي زي كدا .. العلبة بتكون هدية على كل زوج تشتريه ( واو زوج تشتريه .. غريبة الجملة لول ) 

طبعا المفروض تكوني عاملة حساب PayPal ماراح أتطرق له لأنه حوسته حوسة وشرحه كامل موجود بالنت وبشكل أفضل من أي كنت راح أقوله أنا ~ أهم شي يكون الحساب بعنوانك الحالي ورقمك الحالي .. نقطة مهمة جدا 

أختاري 

والآن سجلي الدخول بحساب يس ستايل اللي سويتيه 

هنا ع اليسار بيكون الحاجات اللي طلبتيها .. و اليمين تسجيل الدخول للباي بال!

طبعا بالصفحة كاملة أول شي بيطلع لك العنوان .. ممكن تعدليه عن طريق Change 

وعندك تحته على طول بتجيكي خيارات الشحن .. تبغيه سريع من ٣~٥ أيام بيكلف ١٠$ تقريبا 

أو عادي و بيكون مجاني .. بس السريع أأمن أتوقع للسعودية 

وطبعا تأكدي من الـContact information بآخر الصفحة لأنه مكتب البريد بالغالب راح يتصل عليكي وقت وصول أغراضك.. 

وبعدها بيرجعك للموقع مرة ثانية لتأكيد طلبك .. 

اختاري Continue without gift option 

وبعدها بيطلب تأكيد طريقة الدفع أختاري  PayPal و أخيرا بتختاري Place an order 

ومبروك عليكي .. أول ما يتم توفير طلبك راح يرسلولك رقم خاص للتتبع لتعرفي أغراضك فين وصلت وقد إيش باقيلها 

بالمناسبة الطريقة دي تقريبا بأغلب المواقع لو تحبي تطلبي منها بشكل مبدئي نفس الحاجات تكرر بكل مكان!

التسوق أون لاين دايما أفضل وأريح بالنسبة لي .. وطبعا تبعدي شوية عن نصب التجار وجشعهم عندنا! 

لاتنسو متابعتنا على تويتر & انستقرام ولاتنسو التعليق لأننا جد ننبسط! ولاتنسو تنشرو التدوينات♥

شكرا على دعمكم لنا و بإذن الله بنقدم أفضل ..

بالتوفيق وأي سؤال أنا موجودة!  ♥