مفضلات سبتمبر ٢٠١٣ ~ عناية , موسيقى و حاجات تانية!

وأخيرا! مجال للتنفس شوية .. الأسبوعين الماضيين كانو كابوس .. اختبارات وتسليمات ماتنتهي .. الحياة الجامعية تحتاج لها تضحيات .. #حكم_سنيداي P: 

رجعت بتدوينة خفيفة ظريفة .. وهي من باب العوض ولا القطيعة .. 

راح أتكلم فيها عن مفضلاتي لهدا الشهر .. كنت ناوية اتكلم بس عن الميك أب بس حسيت بيكون شوية اعتيادي وممل فحبيت أدخل كم شغلة تانية تستاهل إنها تنذكر، طبعا يجري التنويه إني ما أعرف أصور فأي صورة عبيطة سوو نفسكم ماشفتوها.. اهم شي الفكرة .. 

راح أبدأ بالعناية وحاجات البنات الكيوت 

Bobbi brown extra eye repair cream 

سعره : ٦٩ دولار أمريكي دون الضرايب تقريبا بالسعودية ٣٥٥ ريال.

للطلب أونلاين~ من سيفورا (بريد داخل امريكا واتوقع يجي للي ساكنين بكندا كمان) و من أمازون عبوة صغيرة تقريبا سامپل بـ٢٠ دولار أمريكي والحجم العادي .. أغلى من سيفورا تقريبا بسعر يوازي سعر السعودية. 

من فترة بدأ منظر عيني جدا يزعجني، جفاف انتفاخ ولونها جدا باهت ومزعج 

ترددت جدا اشتري الكريم لأنه سعره شوية عالي مقارنة بغيره. أقدر أقول ما ندمت أبدا 

أستخدمه مرة بالصباح أول ما أصحى ومرة قبل ما أنام بطبطبة ومساج خفيف تحت العين 

مميزاته : ترطيب عالي جدا، ينفع كمان قبل المكياج يطلع الكونسيلر والمكياج للعين مشرق أكتر

الإنتفاخ تحت العين صار أقل. ما أقول إنه شي سحري وعيني صارت واو تلق.. بس إنه عناية لكن مافتح مرة أو صار شي سحري زي وقت أقرأ الريفيوز عنه.

سلبياته: سعره مقارنة بحجمه، بالنسبة لطالبة مغتربه ف ٦٩ دولار شي كتير .. جدا! احتاج دراسات مسبقة لين استوعبت إني احتاج أي شي لعيني. 

ترطيبه العالي أحيانا يسبب مشكلة خصوصا لو يوم الرطوبة فيه زايدة شوية.. تحتاجي قلييييييل جدا لانه بيصير جدا مو مريح. أتوقع لو عايشة بجدة مثلا حاولي تفكري مرتين أو تستعملي كمية أقل من المنتج بسبب الرطوبة. 

حشتريه تاني؟ يب للآن مبسوطة بالنتيجة باعتبار اني ماتوقعت شي واو أساسا. 

Joseph facial soap -anti-acne sulfur soap

سعره : يتغير كل فترة تصير عروض بس شيكوا على الموقع 

من سنة تقريبا بدأت أخد الركوتان لعلاج بشرتي الدهنية تماما من الحبوب. توقعت الدكتورة تعطيني درزن كريمات و علاجات زي ما أشوف البنات بالسعودية. 

انفجعت ونوعا ما جاني احباط لمن شفتها اعطتني الدوا.. و الصابونة دي وقالت لي استعمل كريمات ترطيب من عندي وفازلين! قلت خلينا مع الكداب لحد باب المدري إيش ومشيت ع كلامها.. فعلا أقدر أقول سحر 

مميزاته: سحر! بسبب نسبة الكبريت فيه فهو يعمل على تنظيف البشرة وخصوصا الدهنية 

الصورة من اليسار توضح حالة الحبوب ( تراكم بكتيريا وأوساخ بالمسامات ) وهو الشي اللي يؤدي بالأساس لتكون الحبة.

صابون الكبريت راح يساعد على تنظيف وتنقيه البشرة وازالة الحاجات المقرفة اللي تسد المسام وكمان تقلل نسبة الدهون بالوجه.. مع الوقت أحس وجهي تحسن وللآن مستحيل أستعمل غسول أو أي صابون تاني حتى بعد نهاية العلاج بشهووور.

الصابونة الوحدة بتكفيكي حتى ٦ شهور وزيادة استعمال مرتين ~٣ مرات يوميا. 

سلبياتها؟ لو بشرتك جافة أو تتحسس أنسي الموضوع راح تعاني منها.. 

الفكرة بالأساس من الصابونة هو عنصر الكبريت.. الشي الجميل تقدري تلقي صابون كتير بالسعودية يحتوي على الكبريت و سعره أرخص من دي كمان.. (أتوقع موجود بصيدليات النهدي بحوالي ٢٥~٣٠ ريال شي قريب منها يحتوي على الكبريت ) 

نيجي لفقرتي المفضلة ~ ميوزك ! 

لستتي الشهر دا فيها حاجات جديدة .. وطبعا من كل لغة وصنف ولون ! 

After School - Heaven 

دانس~ دانس ~ دانس ~ دانس~ 

مو دايما صديقة لانتاجات افترسكول اليابانية .. هدا استثناء كبير ~ فعلا ادمنت ع الأغنية ~

بغض النظر عن الكلمات لول ، الأغنية جميلة ضرباتها شي بالموسيقا الخلفية أعتقد باس أو قيتار؟ ماني عارفة أحدد بس دقاته جميلة بالأغنية خصوصا بالبداية ثانية ٥٩ 

حبيت إنهم نوعو كثير باستخدام الأدوات الموسيقية .. ماني قادرة أحدد أكثر من آلة بس فعلا حبيتها 

البي في جميل .. مقارنة بقبل فدا هيفن فعلا! شكلهم جميل خصوصا جونغ أه ويوي .. أحب الستايل دا عليهم 

لمشاهدة أتوقع تيزر ماحسه كامل ؟ للبي في هنا

شفتوا الأربعه على عامود؟ :| 

AKB48 - Sakura no shiori 

ياكترهم! رينا هي اللي أدتني الأغنية دي بلستة .. أقدر أقول أدمنت

.. ماتوقعت أبدا أحب شي لإي كي بي مع إنه في كم عضوة جميلة ~ عموما 

كلمات الأغنية تجنن ، نغمتهم سوا وترتيبهم مع بعض ليغنوها جد حاز على اعجابي !

الأغنية من هنـا 

Katy perry - roar 

أحب الإنسانه دي ، جميلة فعلا ! وصوتها رهيب .. دايما أحس نادر يتجمع جمال وموهبة لول

حبيت الميوزك فيديو مرة ، أحس دمه خفيف .. 

الأغنية نفسها تجنن تذكرني بأغنية قديمة راح أتكلم عنها في يوم ما !

نادر الأغاني اللي أركز ع المغني نفسه قد تركيزي ع الموسيقا .. 

من هنـا الميوزك فيديو 

كتب؟ 

كتبت عن الكتاب اللي خلصته الشهر دا بتويتر هنـا 

حاجات نتفرجها ~ 

حاليا أتابع إنيمي ياباني Fairy Tail 

مالي مرة بالإنيمي، مو شي أفضل إني أجلس أشوفه .. أوكي أنا نادر جدا أحب أجلس أشوف شي 

بس الإنيمي دا جد لطيف.. مو مرة مع الأكشن و القوة ومدري إيه لكن الإنيمي دمه خفيف فعلا.. وصلت تقريبا لشي وخمسين ... ظريف أنصح بمتابعته لو ما وراكي شغله أو مشغله 

مسرحية إلا خمسة 

من مسرحياتي المفضلة، أبيض وأسود دمها مرة خفيف وتغير جوك البيض! 

خصوصا المقطع بالصورة مهما شفته أكمل أضحك كأنها اول مرة! 

أنصح فيها جدا لمن تكوني طفشانه وتبغي تضحكي!

بس تقريبا، حاولت أنوع قد ما أقدر عشان التغيير~ فكرونا إش تحبو تشوفوا مننا مستقبلا ~ 

تقييمات لشي معين تجربة .. في كل الحالات 

لاتنسو تتابعونا بتويتر وانستقرام!