إيش راح أحتاج ؟ العودة للدراسة! كلمات بسيطة ~

بعد يوم ، يومين بنبدأ نرجع للدراسة! وأخيرا! أوكي مو اخيرا؟ طيب أسفة 

ما بتصدقو كم مرة حاولت اكتب التدوينة دي. كل مرة أعيدها بحيث تكون مقبولة لنسبة كبيرة من القارئات ~

المهم، راعيت بالتدوينة دي إني أراعي قوانين بعض الجامعات/ الدوامات/ المدارس

وحاولت أراعي إنه مو الكل يحب المكياج و الأغلب يحاول يلقى شي سريع خصوصا قبل الدوام! 

كمان حبيت أعطيكم كم دفعة قوية خصوصا اللي داخلين مرحلة جديدة بحياتهم! دفعة لقدام زي مايقولو!

ماراح أتكلم عن منتجات أو حاجات معينة كثير لكن بصفة عامة وإنتي تشوفي اللي يناسبك! 

نبدأ بالأزياء ~ إيش ضروري يكون عندي؟ 

 حذاء مريح! 

أهم شي بنظري.. أي شي تاني يهون.. بالنسبة لي أحس الحذاء الجيد يستاهل كل ريال يندفع فيه 

شي رياضي، والله وعن تجربة الدلع ما ينفع أبدا بالجامعة! أهم شي تراعي إنه

- مريح.. ما يجرح الرجل و مايكون ضيق مرة.

- أنيق، يب مو لازم كعب وحركات لتكوني أنيقة.. الرياضية دايما تجنن وتفي بالغرض.

الفلاتز مو فكرة جيدة أبدا خصوصا لو كان دوامك طويل! الريحة والحر بتصير لا تطاق! 

قمصان..

برأيي القمصان دايما أفضل من التيشيرتات.. باعتبار إنه لازم نلبس طويل

بيكون القميس هو الحل، قطعة وحدة دون ماتضطري تلبسي طبقات كثيرة مع الحر ! و بيكون شكلها مرتب مو قطعة بيجامة زي التيشريت! 

 شنطة مريحة 

صحيح لازم دايما نراعي إنه الشي يكون جميل ، بس الراحة فوق كل شي 

مو ظريف تكوني ماشية تعبانه عشان شنطتك حلوة !!

برأيي هدي أهم القطع المفروض تكون بدولابك~ 

الباقي دايما شي برأيك و يعتمد على قوانين المكان اللي بتروحيله!

المكياج؟

 BB Cream , Tinted Moisturizer or foundation ؟

من أسوأ الأشياء اللي ممكن ترتكبيها بنفسك في الحر دا إنك تحطي طبقات بوجهك .. الكابوس الأكبر لمن تضطري بكل ساعة بالدوام تروحي تشيكي ع الباربي.. 

الفاونديشن برأيي إنه خيار سيء، لأنه ثقيل وإنتي تحتاجي بشرتك تتنفس طول اليوم وتبان مشرقة طول اليوم دون ماتقلقي من تلقيط الوجه كل شوية ~ 

الـ BB Cream برأيي خيار سيء كمان، إلا إذا تحبي تكوني رمادية .. * يعتمد على النوع بالغالب بس ما أنبسطت بالأنواع اللي اتسخدمتها* في أنواع تغطيتها ثقيلة كمان!

الـTinted Moisturizer  هو الحل ~ برأيي إنه أفضل شي تغطيه خفيفة و ترطيب ويعطي الوجه إشراق جيد 

و كمان حماية ضد الشمس.. 

منتج You Rebel Lite Tinted Moisturizer من بينيفت ~

 مالها غير تغطية بسيطة تقريبا ، له درجتين فاتحة وغامقة ( الفاتحة مالها لون تقريبا ، لكن الغامقة ماراح تنفع غير لو بشرتك سمراء مرة لأنه لونه فعلا غامق) 

مشكلته الوحيدة إنه لو عايشة بمدينة ساحلية رطبة .. شيليه من بالك وحتى لو بشرتك دهنية بزيادة

لأنه جد نسبة ترطيبة عااالية .. لكنه المفضل عندي 

موجود بسيفورا سعره تقريبا ١٢٠~ ١٥٠ ريال مو فاكرة بالضبط 

كبديل عندنا Studio Moisture Tint SPF15 من ماك

تغطيته خفيفة وجميلة، مشكلته بالنسبة لي إنه حمايته من الشمس مو قد كدا  

بالإضافة إنه له درجات معينه واللي هو شي صعب بالنسبة لي لأني أطلب أون لاين~ بس طول ماتعرفي لونك إنتي بخير ~ ماعندي فكرة عن سعره بالسعودية للأسف * ماعندي المنتج حاليا عشان أصوره للأسف * 

أكثر فرصة أنصح بيها لتغطيه طبيعية ودقيقة هي Sigma F80 

 Photo Set finishing POWDER من smashbox ~ 

إطلالة مات ليوم كامل دون لمعة ~أسوأ شي لمن تلقي نفسك تلمعي بوسط الدوام .. منظر سيء شفافة وممتازة مع أي فرشة باودر كبيرة خصوصا للأنف~ 

** حواجب طبيعية ~لحواجب جميلة وطبيعية ومرتبة أفضل دايما الپاودر ..

عن نفسي أفضل Brow Zing من بينيفت له ٣ درجات، بس لا تاخدي الغامق أبدا حتى لو حواجبك غامقة.. بيصير المنظر سيء عموما ماحبيت فرشته الأفضل يكون عندك فرشة حواجب مشطوفة ( بالصورة الفرشة من ريل تيكنيك).. 

طبعا في حاجات كثير زي الكحل الماسكرة أوراج طبيعية أو قلوسات خفيفة .. أختاري اللي يناسبك بس حبيت أتكلم عن الضروريات بالنسبة لي 

ملاحظات؟ ترتيب ومهام ~

 بالنسبة لي دفتر يوميات/جدول لي يعتبر أهم حتى من ملابسي ! دفتر بسيط/ ملف من تصميمك أي حاجة راح تؤدي الغرض أهم شي تكوني مرتاحة لها أجلسي ببداية الترم بدفترك مع قلم وحددي مواعيد تسليماتك / برزنتيشنات / تسليم أوراق وواجبات / اختبارات ..الخ الخبتكوني مرتاحة فعلا بالطريقة دي لآخر الترم! 

كلمة أخيرة .. 
إن كنتي ببداية مرحلة جديدة، حاولي تبدأيها بشكل طيب.. 
مو كل من اكتئب ببداية الجامعة أو الثانوي يعني بالضروري إنتي تصابي بالكآبة .. بالعكس حطي ببالك إنها بتكون من أروع سنين حياتك .. 
بس بالترتيب ، وبعلاقات جيدة وبحرصك على مستقبلك بتكون الأروع بحياتك ..
الناس فاضية لكن إنتي لأ ، وراكي حياة .. تبغي تجرب ورا الدرجات أجري وراها.. اللي يضحك عليكي ماراح يستفيد
إنتي مالك بغيرك وغيرك مالهم فيكي.. 
لا تسمعي كلام أحد يحاول يخوفك أو يعمل دراما.. الحياة أسهل من كدا و الناس دائما بيحاولو يحبطوكي
إن كان لك طموح فامشي عليه، إيش راح يهمك إن توظفتي بعدين لكن بمجال ماتحبيه لمجرد إنه الطلب عليه عالي؟
عيشي بالمجال اللي تحبيه وإنتي بتبعدي وبتلقي الطريق منور قدامك إن شاء الله !
امشي كل يوم لوعيشي لحلمك ~ حياتك من اليوم بتكون أجمل ! 

كلمة أخيرة ثانية أعتذر عن التصوير السيئ .. أحاول أحسنه مع الوقت مع إني ما أملك ولا ذرة مهارة بالتصوير xD