تجربتي مع موقع Verbal Planet لتعلم اللغات ~

من فترة بسيطة .. في الواقع طويلة جدا و أنا أحاول أتعلم اليابانية .. 

برأيي إنها لغة جدا جميلة وأعتقد إنها بتكون مفيدة لي جدا بالمستقبل بطريقة ما .. 

حاولت بكذا طريقة ، كتب مواقع أونلاين سي ديهات الخ الخ .. وكنت أرجع لنفس النقطة .. أحس بالشتات وبإني مو عارفة بالضبط إش أبغى .. بالتالي كانت الإستفادة = صفر! 

وكأني جالسة أدور ع ربطات شعر بغرفة مليانة غسيل .. أوكي تشبيه عبيط بس ماعلينا أتوقع وصلت الفكرة .. 

جلست أحوس وأدور.. بلاد تشيلني وبلاد تحطني .. لين خير اللهم أجعله خير لقيت الموقع 

الظريف دا 

Verbal Planet 

سجلت بالموقع ، حست فيه ولقيته جدا جيد.. بحثت عن أساتذة للياباني ولقيت كم لا بأس به مع ريفيوهات ممتازة! 

فقررت أجرب !

الأستاذة اللي اخترتها كانت تطلب إنها تكلمني قبل ما أحجز أي كلاس معاها .. 

كلمتها عن طريق سكايب حددت مستوايا ، وطلبت كتاب … طبعا أنا إعدادات السكايب كانت ع السعودية فسألتني إذا يقدر يوصلني الكتاب من امازون -على اعتبار إننا صحراء جرداء لا زرع فيها ولا ماء- واقنعتها إنه بيوصلني الكتاب..

وفعلا بدأت أحجز مواعيد كل فترة ووصلت للآن ٧ كلاسات معها وجدا أحس بإنتظام و تركيز ! 

أوكي .. في البداية إيش أحتاج ؟ 

- إنترنت كويس .. لو الشبكة عندك سيئة أنسى جدا الوضع بيكون سيء.

- برنامج سكايب & حساب فيه - لو ماعندك وصدف إنك ماعرفتي هنا الطريقة 

- فيزا/ ماستركارد - أو حساب بالباي بال.

نفتح الموقع https://www.verbalplanet.com - نختار Create account

المربع الأول : الإسم اللي راح يظهر للكل.

المربع الثاني : كلمة السر.

المربع الثالث : الإيميل.

المربع الرابع : اللغة اللي تبغا تتعلمها.

المربع الخامس: العملة اللي بتتعامل فيها إذا ريال أو دولار.

المربع السادس: دولتك !

المربع السادس: الخط الزمني؟ شي زي كدا طبعا تختارو دولتكم :) 

بيوصلك إيميل ماعليك غير إلا تضغط على الرابط لتأكيد الحساب. 

والآن وقت إختيار الأستاذ .. 

بعدها الخطوات جدا سهلة ، بيطلب منك تفعيل أكاونت السكايب.. تحطي معلوماتك

بعد ما تقرأي بروفايلات و تقييمات الأساتذة. ممكن تراسلي الأستاذ لموعد تحديد مستوى يعتمد على حسب كل أستاذ أو تحجزي موعد على طول. الدفع عن طريق الـPay Pal في الطريقة هنا - بيكون جزء من المبلغ للحجز… 

بعد الكلاس الأستاذ/ة بيرسل إيميل حسابه بالباي بال وترسل باقي المبلغ للكلاس لحسابه

الأهم الآن.. إش مميزات / مو مميزات؟ نسيت الكلمة لول 

المميزات: 

- التنظيم! يا الهي رائع بتعرفي مكان رجلك من راسك! و بتصيري أقوى بالمحادثة وتعرفي عن الثقافة والإيتيكيت أكثر من متحدثين أصليين للغة! 

- من بيتك، بصراحة ماعندي أبدا وقت أخذ كلاسات خارجية أو كلاسات لغة بالجامعة جدولي جدا ما يسمح فآخد كلاسات كل سبت مثلا أو مرة كل أسبوعين على حسب إنشغالي. 

- الأستاذة اللي أتعامل معها بتعرف قوتك وضعفك.. مثلا أنا تركز مرة ع الأرقام / الأوقات الساعات لأني ضعيفة جدا فيها @@ كابوس مقارنة بالكلمات العادية، الفوكابز. 

المو مميزات:

- بصراحة ميزانية عاليه… إن كنت مثلا بتاخد ٤ كلاسات بالشهر ب٢٠$ للكلاس وتقريبا دا أقل شي معناها بتضيع ما يقارب ٨٠$ بالشهر.. واللي تقريبا كثير لشخص مسؤول عن ميزانية بيت طالب مغترب @@. 

وبس دا اللي عندي لليوم ~ بالمناسبة أذكركم  إننا ٢ اللي نكتب بالمدونة مو وحدة .. بديت أحس إنكم تحسو إننا وحدة عندها ٩٠ شخصية .. 

لاتنسو تشاركو التدوينة عبر وسائل الشبكات الإجتماعية للعظة والعبرة ! :)