وحشتوني :$ وحشتني المدونة كمان!
الإنقطاع عن الكتابة لفترة موضوع عبيط.. خصوصًا لمن تجي تكتبي للمرة اللي بعدها.. تنسي تماما كيف تبدأي!
عارفين، إحنا بدا الوقت من السنة أو الترم اللي تحسي نفسك بتجري ورا حالك لتلحقي تخلصي
أو لتدركي مافاتك .. يعني توك مثلا تستوعبي إن كان وراكي رسوب أو شي يعني لول ..
تدوينتي جد مالها هدف … بس فضفضة .. وإنتم تقرأوها ، جربو ولو للحظة .. تفكروا فيها .. فكرو بحياتكم .. يا ترى تعرفو أحد زي كدا؟
.
.
نرجع … فلاشباك
* ٣ سنوات قبل *
عارفين، ديك اللحظة اللي الكل يطالع فيكي .. يستنوا منك زلة ! يستنو منك تغلطي بكلمة؟
يمكن أول ما تخرجي من باب الغرفة بيتكلموا عليكي.. بيضحكو !
أوه، عارفين كمان.. جد أفكر أسافر وأدرس برة .. اخاف أتكلم، ما أبغا أحد يضحك علي!
هممم إن نزلت أمشي شوية رياضة يا ترى بيضحكوا عليا؟
أخاف أتكلم وأجاوب ويطلع جوابي غلط ؟ ما أبغا أتفشل !
إن لبست اللبس دا ، سويت شعري كدا خرجت كدا بلا بلا بلا
اتركووووووووووني في حاالي .. ابعدو عني! أبغا أعيش … للان أنا أعيش برعب .. لو بس يتخطوني.. أنا مو موجودة!
كانت ذكريات سيئة ، كل لحظة كل دقيقة أذكر قد إيش ضيعت على نفسي بفترة المفروض فترة جميلة كلها مغامرات
أحس إنه جزء كبير ممسوح من حياتي! و كأنه فيلم مقصوص من نص مقطع الأكشن فيه! .-.
كل خطوة ، كل كلمة أعمل لها ألف حساب وحساب .. أقدر أقول نسبة كبيرة من درجاتي راحت لأني استحي! اخاف ! أرتبك ! تخرجت .. تقريبًا معدومة الشخصية عايشة في كوكبي الوردي الصغير ..
كان شي مزري فعلا!!!
.
.
.
الجانب المشرق !
فجأة، صار شي مو بالحسبان .. ما أعرف إش صار ولا كيف بس أهلي وافقوا إني أكمل دراستي برة !
وكأنه حلم! أنا تكلمت…. محد حشني على غير توقعي لكن أهلي شجعوني! وتحمسو بزيادة لول
شي ما كنت متوقعته ، ماجربت أصلا عشان أعرف .. حتى الجزء الرافض من العيلة رفضا بتاتا قطعيا مدري كيف قدرت أتغلب عليهم ! كله جا ورا بعضه !
بعد تخرجي ديك الفترة، بدأت بمعاملاتنا الحكومية اللزيزة! عارفين روعة شحططة تصحيح مصيبة سوتها الوزارة .. وبدون أمي أبويا.. الرعاة الرسميين .. قالولي أتصرفي بنفسك !
وقتها بس ولأول مرة لاحظت شي ممكن غير بحياتي … الخجل ما يجي يا هبيبي! * مدري ليه جت ببالي زينات صدقي خخ *
عندك حق خش في عين اللي آخده منك! وفعلًا دون ذكر تفاصيل بدأت وحدة وحدة أتحسن !
صرت أحاسب بنفسي ياي!
صرت أكمل أوراقي الحكومية بنفسي ياي!
صرت أتكلم إن كان لي حق !
ماعلينا .. بس جد لاحظت تغيير رهيب ..
صدق اللي قال البجاحة هي الحل .. * هي مقولة أو حساب بتويتر :|؟ ما علينا*
ما أقصد بجاحة بطولة لسان .. بس بدون أترك حقي !
* الآن ٢٠١٣ *
مع الوقت ، بديت أخرج من منطقة راحتي لمن وصلت أمريكا..
أحيانا كان وضعي كابوسي و أشياء أتمنى بس أنساها.. ما أقدر أقول إني تغلبت على نقطة إني أنا محور العالم والكل يطالع .. وللآن بصراحة أدور حل
صرت أفكر بالإستمتاع بالحياة’ ، أجرب حاجات جديدة .. أتطوع مع إنه التطوع ومقابلة الناس كابوس
خرجت من منطقة راحتي بشكل كبيييييييير ومن ضمن الخروج إني تخصصت تغذية علاجية!
نوعا ما تحسنت علاقتي بالناس وصايرة أتعرف على كل من هب ودب لدرجة صايرة أنسى الأسماء :|
طبعا الشي اللي مفاجئني بزيادة هو إني أسأل لو ما اعرف .. تصدقو؟ كنت أول أموت وما أسأل حتى لو سهرت أبحث!
صرت شبطة لو مافهمت شي لول
بدأت أتعلم اليابانية مع أستاذة كيووت و أحس بتحسن !
بدأت أعيش… أبادر!
.
.
.
لسه قدامي وقت طويل مع مشكلتي ، بس الشي الكويس إني عرفت بوجودها! أو اعترفت لأني عارفة من أول بس أستعبط..
راح أدور علاج وما بستحي أقولها .. كلنا مولودين بعاهات ومحد فينا كامل!
راح أخرج من منطقة راحتي و أجرب وأسأل وأتعلم ! محد خرج من بطن أمه متعلم!
* قد فكرتو فيها بالمناسبة ؟ واحد يخرج من بطن أمه مثقف أو متعلم .. لأ؟ أوكي كنت أسأل بس *
.
.
عارفة تدوينتي عبيطة، لأول مرة أتكلم عن هالشي بتوسع كدا .. أحس بالشتات من كمية أحس بالتدوينة أعتقد
أحس نسبة كبيرة من البنات هنا وهناك يعانوا من نفس المشكلة ، يمكن .. لو عرفتو إنه في أحد في دا العالم عنده نفس الشي.. بتشعروا بشعور أفضل!
بتتحسنو يوم عن يوم المهم إننا نحاول … مافي شي إسمه ما أقدر ومحد بيطالع في كل حركة تسويها عشان يحشك *ممكن في لو وحدة فاضية فاشلة ماعندها شغل ولا مشغلة,, * إنتي إنسانه مشغولة … وراكي حياة!
ليست هناك تعليقات:
إرسال تعليق