.
.
.
مصدر الصورة
وأخيرًا خلصت الترم التعيس دا.. ماتصدقو كان شي لا يطاق قد إيش..
ماعلينا، متفائلة بالأترام الجاية بشكل غريب .. خير خير
عموما من فترة ببالي أكتب لكم عن تجربتي لثقب غضروف الإذن… أحس الكثير يحبو شكله لكنهم مترددين خصوصا مع المبالغات و الحاجات العجيبة اللي يقولوها الناس *برغم أحيانا مايكونوا جربوها بس عباطة ومبالغة*
وصف بسيط لحالتي.. أنا من صغري أكره الحلقان .. الحلقان الأساسية ما ألبسها لفترة وكانت مرات كثيرة تلتهب إذني لمن ألبس حلقان فجأة!
وطبعا موضوع خرق الإدن أخراق تانية كان شبه ممسوح من بالي …
رمضان الماضي، مدري إيش جرا لعقلي و نزلت سويت ٣ أخراق زيادة! إتنين تاني في الشحمة واحد بغضروف إذني اليسار! تشجعت شوية لكن حسيت بالخوف من الألم وأستعديت لألم شنيع ونوم ضايع لأيام!
نظرة طبية عشان تعرفو إنتم حتعملو إيه !
* من ويكيبيديا - أذن الإنسان*
اللي يهمنا هنا هو الإذن الخارجية (الصيوان) وهو الجزء الظاهر لنا من الإذن
الصيوان عبارة عن غضروف مرن *نسيج مو عظمة!!!!!* .. و الجزء اللي دايم نسوي فيه الحلقان من صغرنا وهو الشحمة وماعندي أي فكرة إش إسمها العلمي ..
الطريقة؟
* أتكلم عن الطبية واللي سويتها ما أأيد أبدا اللي يهببوه بالبيوت والمدارس لأنه ممكن جدا ينقل عدوى و يتعب الإذن*
كل اللي بيستخدموه
- مسحات طبية لتعقيم المنطقة.
- مسدس طبي.
- حلق.
هذا شكل المسدس وبيركبو فيه الحلق
العملية بسيطة جدا.. بس تحددي مكان الحلق وكبووم! ما بتحسي غير بشكة بسيطة و شي يلسع من وقت للثاني.. بس مو بشكل لا يطاق لا عادي كأنه شي طبيعي ..
ماتاخد وقت أبدأ .. بالغالب الممرضة اللي تسويها… أتوقع جلسنا بالإنتظار أكثر من الوقت اللي أخدته العملية الفعليه لول!
ماعندي شي أقوله زيادة عن العملية نفسها لأنها بجد لا تذكر أنا توقعت بصرخ من الألم وأنصرع
بس أنا سويت ٣ مرة وحدة وجد ماحسيت غير بحرق بسيط أحس إذني أنصدمت بس خخ
تجربتي الشخصية!
ذكرت لكم إنها ما أخذت وقت أبدا! يمكن لأني سويت الـ٣ مرة وحدة فحسيت بنغزة..
الحق ينقال تقريبا همم ٢ و ٣ يوم انتفخت وماكنت أقدر أنام عليها.. لونها صار موف لأني خبطتها دون قصد.. بس لازال ألم عادي.. مو شي بشع شنيع لا يطاق.. في ألام أشنع منه بصراحة..
من وقتها طبعا وأنا أعشق الحلقان بكل أخراق إذني! عامل جمالي بشكل ماتتخيلوه طبعا لمن يكون شي ناعم في حاجات كثيرة مقززة شفتها وأنا أدو صور للتدوينة .. أتوقع بغضروف إذن وحدة كفاية مو حلى هو !
الشي السيء بالبداية لمن أغسل شعري و يدخل في الحلق وأحاول أخرج .. كان ألم مستفز بس مع الوقت تعودت…
طبعا جلست ٣ أشهر لين غيرت الحلقان.. أحب أكون بالسيف سايد ! * رينا تقول غيرتهم بعد أسبوعين فأتوقع من شخص لشخص*
قدرت أفصخ الحلقان وأنضف إذني تقريبا بعد أسبوعين بالبداية ما أنكر كان شيل الحلق والتنضيف يعور.. بس مع الوقت صار زي الحلق العادي.. للآن أنا كملت ٥ شهور فيه وجد مبسوطة إني سويته
مهم جدا تخلو ببالكم وإنتم تخرقو للمرة الأولى إنه الحلق يكون عريض شوية .. بيريحك بعدين بالحلقان الإكسسوارات لأنه الخرق بيكون كبير أنا أرتحت مرة من دي الناحية ..
إنتم تخيلو الوضع.. لو كان رفيع زي الإبرة ودخلتي فيه حلق عريش بمرة .-. كابوس * رينا هي اللي نبهتني لدي النقطة وما أستوعبتها غير قريب * عشان كدا فكرو فيها من بدري!
نقطة مهمة كمان… بعد مايخف الإنتفاخ .. حاولو تحركو الحرق وتلفوه عشان لا يتخثر بمكانه وبيعوركم بعدين.. ما اقولكم العملية دي ماتعور لكنها في مصلحتك لاحقا ..
العناية
النظافة أهم شي .. بعد أسبوعين حاولي تشيلي الحلق بشكل خفيف.. بيعور بس ماراح يقتل! عقمي الحلق بمسحات طبية عقمي إذنك بالمسحات كمان!
أنا للآن أواظب ع تنظيفها وتعقيمها كل يومين ~٥ أيام …
وبس! مافي شي زيادة جد شي ماراح تندمي عليه وبتحبيه! وبتحبي الحلقان وهذا كان شي جدا كبير بالنسبة لي لأنها كانت كابوس !
طبعا الحلقان الطبية دايما أفضل بالحياة اليومية .. ممكن تلبسي اكسسوارات من وقت للثاني.. بس الطبي كعادة صحية يومية لك عشان لا تلتهب عليكي .. :)
لاتنسو تشاركو التدوينة على تويتر!
الحب & السلام العالمي لول!
ليست هناك تعليقات:
إرسال تعليق