وأخيرًا قربت إجازتكم الصيفية على النهاية 
مبروك لكل اللي انقبلو بالجامعة، قدامكم رحلة جديدة وصفحة ثانية بحياتكم!
.
.
أول ما بديت دراسة صراحة خبصت كثيييير من أغلب النواحي، للآن أخبص ما أنكر، بس على أخف شوية.. نقدر نقول تعلمت من أغلاطي كتير.. اليوم التدوينة مابتكون فاشن أو عناية أو أي شي تاني.. كلام من رأيي.. ثالث سنة بالجامعة وأتوقع ممكن أفيدكم بشي..
بس راح أتكلم اليوم عن نقاط غفلت عنها بأول فترات دراستي وتمنيت لو يرجع بي الزمن عشان ألحق على عمري :(
١. التسجيل المتأخر للجدول ..
من أسوأ الأخطاء اللي سويتها بأول سنة، على حسب نظام الجامعات يختلف طبعا.. بس أول ما يفتح التسجيل حاولو تلحقو.. الأستاذة الكويسين يطيرو، و المواد المهمة ممكن تتقفل و جدول السنوات الجية كله يتلخبط!
قاعدة: دائما خلي عندك فكرة عن الأساتذة، الأفضل ، حاولي تسألي الطالبات قبلك عن نظامهم دوري بمنتديات الجامعة وأسألي دوري بالبحث بتويتر إلا ما راح تلاقي أساميهم من هنا أو هناك.. على الأقل تعرفي راسك من رجلك..
٢. غياب أول يوم / أسبوع ..
مهما كان الحضور أول أسبوع حاولي لا تفوتي أول أيام.. باقي الأيام مو مهمة غيبيها لو نفسك xD
بس أول يوم هو اللي الأستاذة بتعطيكي توقعاتها منك بالترم، ممكن متطلبات الكورس، تواريخ مهمة، تعرفي شوية عن أسلوبها، في تحضير او لأ لو حبيتي تهبّقي مستقبلا يعني…أول فصل دراسي لي غبت أول يومين.. أقدر أقولكم مجموعات الـB و C بمواد ماتستاهل كانت شي محبط بالنسبة لي بس لأني فعلا ما كانت أعرف إيش صاير!
٣. صرف المكافأة كاملة
أقدر أقولكم إنه مكافأتي ماكانت تجلس لنص الشهر، أضطر أشحت من الأسرة الكريمة فوق دا كله لأمشي أموري..
شي سيء جدا إنه أول ما تنزل المكافأة تضيعيها كاملة ع حاجات بسيطة…دائما خلي مبلغ بسيط لو ١٠٠ ريال كل شهر على جنب أو بحساب ثاني.. راح يجي وقت تحتاجوها لشي مهم.. أو شي أحلى من التناتيف الصغيرة اللي لاتسمن ولا تغني من جوع!
٤. الثانوي ..
لنكون واضحين هنا،،، مستواكي بالثانوي،حياتك وكل شي يتعلق بيه المفروض ينرمي أول ما تخطي الجامعة ..
غلطة كبيرة طحت فيها إني توقعت إنه أسلوب دراستي بالثانوي بينفع بالجامعة.. دوريلك طرق جديدة وجربي أكثر من مرة.. الجامعة يبغالها ضعف شغل الثانوي، فعلا فيها حرية أكثر.. بس المشكلة في أي نقطة بتأثر بمستقبلك فخلي بالك تمام..
نفس الشي ينطبق لو مستواكي سيء بالثانوي لايعني بالضرورة إنه بيكون نفس الشي بالجامعة.. شفت بنفسي ناس مستوياتهم مو قد كرا بالثانوي واليوم ماشاء الله مستواهم شي تاني!
٥. اختاري صديقاتك
أول شي مهم تعرفي ناس لهم نية في دخول نفس تخصصك، عشان تتعاونو سوا بالتحضيري أو بفترة اللغة وتسهلو على بعض حاجات كثير
طبعا كمان مهم تعرفي أحد أكبر منك بالتخصص، حاليا تويتر ماخلا شي أبدا! بتعرفي ناس من كل التخصصات وكثير بيكونو بنفس جامعتك.. حاولي تتعرفي أحد بالتخصص اللي تبغيه .. أسألي عن القبول، المواد، الخطة الدراسية، الأساتذة، المستقبل الوظيفي! قابليهم جدا تجربة حلوة بتكون! حاولي كمان تتعرفي على متخرجات من تخصصك وتشوفي إش الصعوبات اللي واجههتهم!
طبعا ولا غنى عن صحبات بكل تخصص، بيكون شي يخرجك كمان من روتين تخصصك وتعرفي وتسمعي حاجات عجيبة جدا عن كل تخصص!
٦. خدي الإختبارات بجدية
عكس الثانوي، كل اختبار تختبريه بيفرق بمعدلك .. انتبهي لأني بجد اتنكبت على بالي زي الشهري حق الثانوي وانصدمت بالواقع:(
حضري لكل اختبار وكأنه فاينل.. صعب بيكون بس حاولي مرة على مرة تلقي طريقة أسهل لك وتختصر الوقت
٧. الترتيب
هالنقطة جدا مهمة، دائما خلي معك دفتر أو صممي أي أوراق أو جداول تلقيها بالإنترنت لكل شهر عشان تعرفي إيش لك وإيش عليكي للترم…أجلسي جلسة رايقة بعد أول أسبوع دراسة و اكتبي كل المتطلبات بالجداول بتواريخها المحددة عشان لا تتفاجئي باللي بتلقيه!
في كاليندرات ظريفة على ebay ، وأكيد بتلقو بسنتربوينت، جرير و دايسو وغيرها!
ممكن تلقوها كجداول جاهزة بكل مكان بالإنترنت أطبعوها وعلقوها أو حطوها بملف صغير! وممكن لو كنتي من اللي يرتاحو للأجهزة تستخدمي الكاليندر بجوالك.. مع إني أحس ممكن تضيع بلحظة لو جوالك أو جهازك صار فيه شي..
ما بتصدقو قد إيش بترتب حياتكم..
٨. لا تستحي
أسوأ شي الحياء في غير موضعه، مو غلط تسألي لو مو فاهمة. لو تستحي تسألي قدام الناس روحي بعد الكلاس واستفسري!
الأساتذة بيدهم حاجات كتير، ممكن تكلميهم على اكسترا كريدت وبيطلعولك شي تسويه لترفعي معدلك.. مو غلط وكثير يسووها أمسكي بدرجاتك بإيدك وأسنانك خصوصا ببداية الترم، غالبا بنهايته بتكون أخلاقك وصلت مرحلة " أبغا أخلص وبس" ..
٩. اعرفي وقت صحصحتك
غالبا الوضع بيتغير مع الدوام عن وقت الثانوي، بس لو في مجال حاولي تسجلي المواد بوقت تقدري تصحي فيه
+ خلي وقت الدراسة بوقت تقدري تجمعي مخك فيه، إن حاولتي تذاكري باخر الليل وإنتي مخك يصحصح بالصبح فغالبا ماراح تستفيدي شي غير صداع وقراءة طلاسم غير مفهومة! اعرفي الوقت اللي يناسب مخك !
١٠. العادات الصحية/ الهوايات
الجامعة فرصة حلوة إنك ترتبي حياتك.. خلي دايما وقت لنفسك، لروحك، لمخك، لدراستك،عيلتك ، صحباتك نمي هوايات جديدة
تعلمي لغة جديدة بوقت البريك مثلا! حتى لو كم كلمة! تمرني تمارين بسيطة اول ماتصحي عشان تنتعشي.. أسألي عن الجيم الخاص بالجامعة ، شوفي نشاطاتهم.. ولاتنسي تفطري.. عن تجربه الفطور الكويس يصحصح حتى لو ماتحبي تفطري!
هذي الأشياء اللي حسيتها مهمة، اللي لهم فترة بالجامعة إيش الشي اللي تمنو يعرفوه قبل؟ ياريت تذكروه هنا أو بتويتر عشان الجدد يستفيدو! وطبعا بدون حش وتريقة .. كلنا كنا "مستجدات" بيوم ما!
وبالنسبة للبنات الجدد إيش حابين تعرفوا أكثر عن الجامعة؟ دائما معكم لأي شي تبغونا نكتب عنه!
لاتنسو تنزلو تعليقات وتنشرو التدوينة إن عجبتكم♥
إيش المنتج اللي أعجبكم و تحمستو تعطوه فرصة؟ تبغو نكتب تدوينة عن شي من اللي فوق؟
أو لكم تجربة مع شي منه؟ ♥♥
email us @ business.sunnyday@gmail.com
موضوعك جميل *^*
ردحذفوااه شكراً لك افدتيني *0*
ردحذف